2 JOHN Di lua lede a John
Tangada ne hihi di lede deenei:John, tangada agoago hagau
Di haga modongoohia
Di lua lede a John la ne hihi go “John, tangada madua daumaha” ang gi “di ahina haga aloho mo ana dama”, holongo deenei gu modongoohia di nohongo dabu mo ono daangada. Di hagahonu o di lede deenei go di haga iloo bolo gi hagadau aaloho, mo tuu i daha mo digau agoago tilikai mo nadau agoago.Di hagahonu di beebaa deenei:Di haga modongoohia (1-3)Di hagalabagau o di aloho (4-6)Di hagailoo hai baahi gi nia agoago tilikai (7-11)Di hagaodi di lede deenei (12-13)
2 John
1Mai tangada madua daumaha,Ang gi di ahina hagaaloho, mo ang gi ana dama ala e aloho huoloo iei au. Hagalee koau hua, mo digau huogodoo ala e iloo di tonu. 2Idimaa, di tonu le e noho i tadau lodo, ga noho hua beelaa i tadau baahi.
3God Tamana, mo Jesus Christ go Tama, gi dugua mai gi gidaadou tumaalia, di aloho, mo di noho i di aumaalia. Nia mee aanei gi noho hua belaa i tadau baahi i di tonu mo di aloho.
Di tonu mo di aloho
4Au e tentene huoloo i dogu gidee hunu daangada i au dama e mouli i di tonu, be di hai o taganoho o Tamana dela ne dugu mai gi gidaadou. 5Gei au e dangi adu gi di goe, dagu ahina hagaaloho, bolo gidaadou huogodoo gi hagadau aaloho. Deenei hagalee taganoho hoou, dela e hihi adu ko au gi di goe, deenei la go taganoho gu lawa di kae go gidaadou mai taamada. a 6Di aloho dela e helekai iei au, e haga modongoohia bolo gidaadou gi hagalongo gi nia haganoho a God. Taganoho dela gu longono goodou mai taamada bolo goodou huogodoo gi mouli i di aloho.7E dogologowaahee digau halahalau dangada gu modoho i henuailala. Digaula e haga de iloo, bolo Jesus Christ gu hai tangada. Tangada beenei la tangada halahalau dangada, deelaa di hagadaumee o Christ. 8Gi pula i goodou gi dee kili gi daha godou mee ala ne ngalua ginai, gi kae godou hui hagatau.
9Tangada dela gu iloo ia nia agoago o Christ, geia hagalee hagamau dangihi ginai, gei God hagalee i dono baahi. Tangada dela ga hagamau dangihi ia gi nia agoago aanei, gei Tamana mo Tama la gu i dono baahi. 10Deelaa laa, maa tangada ga hanadu gi goodou, hagalee e agoago adu nia agoago aanei, goodou hudee benebene ina a mee gi lodo godou hale, ge hudee helekai labelaa gi mee, “Di aumaalia gi noho i doo baahi.” 11Idimaa, tangada ma ga benebene mai tagadilinga dangada beenei, geia gu hagabuni ang gi nia hagadilinga huaidu a mee ne hai.
Nnelekai hagaodi
12Nia helekai e logowaahee i golo e hiihai ginai au belee hagi adu gi goodou, gei au hagalee hihi nia maa gi di inki mo nia lau beebaa, i di au e hagadagadagagee bolo au e hanadu, ga helehelekai laa gidaadou, gei gidaadou ga tentene huoloo.13Nia dama o doo duaahina ahina hagaaloho e hai di nadau hagaaloho adu gi di goe.
Copyright information for
KPG